FB مكتب الصحة

لمن لا يعرف ما هو مكتب الصحة فهو المكان الذي يعطي الاوراق القانونية ، من تسجيل لمواليد ، و وفيات 

***

تزيد التفتيشات عندنا ، فنحن وحدة مهمة ، لأن بها مكتب صحة ! 

***

يجب ان يمر عليك - في اي مكان عمل جديد - قرابة شهرين بحد ادني ، كي يتوقف الاخرون عن التعامل معك كأنك غريب ، و كي تبدأ ، مجرد، بدء بفهم الشخصيات التي تتعامل معها ، و غالبًا لا تعرف وحدك و لكن تقودك الصدف و تصاريف القدر لإكتشاف الخبايا .
**هو ليه فيه تفتيش كتير الفترة دي ؟
*اصلهم ناويين ينقلوا مكتب الصحة من عم ابراهيم ..
** ؟؟
* أصله بياكل ..
** اه بياخد علي كل ميلاد فلوس و علي كل وفاة فلوس بس اقل ...
* طيب و هيمسكوها لمين ؟
** لعم بدر بس من الدرا ، بشكل رسمي الاساسي هيكون الاستاذ علي بشكل استثنائي لانه لازم كاتب اللي يمسك مش مراقب صحي و الاستاذ علي مراقب بس هيمسك لانه مفيش حد من الكتبة ، عم بدر كان ماسكه قبل كده بس حصلت مشكلة و مشي فيها و اديكي شايفة علي يدك يا دكتورة  ...  ، عم ابراهيم واكلها والعة .. و بياكل اه بس في الاوان الاخيرة بقي دباح اوي وعملوا له محضر رشوة مثبت بصور البطايق بكله ميخرش المية .. و الست عزيزة ست اجارك الله يتفات لها بلاد و عاملة مشاكل مع طوب الارض .. اما عم محمد هو الرجل الوحيد المحترم اللي فيهم و علي طول بيخوفوه و هو اساسا مبيحبش يعمل مشاكل مع حد ... و الباقي بتوع ال 5% معاقين ( نسبة قانونية في اي مصلحة حكومية لابد من تعيين 5% معاقين فيها ) و لا يحسبوا .
*و هو عم بدر أحسن يعني ؟
** هو بياكل بردو ، مفيش حد في مكتب الصحة ده مبياكلش .. بس اكل عن اكل يفرق
* ازاي يعني ؟؟
** يعني هو مثلا بياكل اه بس بالمعقول ، مش بيدبح الناس ، و مش بيحط كتير في جيبه ، بس بيظبط الوحدة ، لمبة محروقة يجيب ، سباك يجيب و يحاسب ، بيشغل الحمامات بتاعة الجمهور العطلانة دي ، بيجيب كراسي الناس ترتاح عليها .. كده يعني
* طب و هو اصلا مفيش مصروفات للحاجات دي من الوزارة اساسا ؟؟
** فيه ، بس بتتقص بدري بدري في المنطقة و مش بيوصل لنا اي حاجة و لعلمك ، بتتقص قانوني ( كلهم بيعرفوا يظبتوا ورقهم )
* طب و هما ليه اساسا لسة محتفظين بالناس التعبانة اللي معروف انها بتاكل دي ؟
** علشان مفيش تعيينات دلوقتي كلها عقود غير مثبت بملاليم محدش يرضي بيها - اللي موجود هو اللي موجود ، ده غير اساسا انه المكان بعيد اوي عن العمار و مفيش حد يرضي يجي هنا الا الناس القريبين .. و دول بردو مش بيعرفوا يدخلوا الوزارة بسهولة . غالبًا الحاجات دي متحجزة لولاد اللي موجودين هنا ، غير انه لو متعرفيش حد مشاوير اد كده للمنطقة رايح جاي و مخدش فاهم الدنيا ماشية ازاي اساسا . متسأليش كتير يا دكتورة

*****************************

أوشكنا علي الرحيل ، و لكن جائتنا اشارة تقول انه هناك حالة وفاة قادمة من المستشفي المركزي ، ولابد من توقيع الطبيب علي شهادة الوفاة .. قال الطبيب الذي كان سيوصلنا للمحطة متاففًا ( ما فيه دكتورة نبطشية خلوها هي اللي تكشف و تمضي ) و لكن الكاتب اصر ان ييبقي الدكتور و قال اسباب غريبة فرضخ الطبيب الطيب له ..

وصلت ثمناية ( عربية صغيرة سوزوكي مغلقة تستخدم لنقل البضائع و لكنها لنقل الناس في بعض المناطق ) بها أهل القتيلة ، التي توفت في حادث سير علي الصحراوي من سيارة جيش .. عرفت تلك المعلومات و كان يتم التكتيم عليها بشكل غريب ، نظرت في الثمناية الخلفية فلم اجد اي جثة ... قلت لهم اين السيدة ؟ قالوا انها في المستشفي المركزي و كشف عليها الطبيب المركزي و لم يوقع علي الاوراق هناك و قال ان الشهادة لابد من توقيعها من طبيب الوحدة التابع لها مكان الحادث اداريًا !! لم استوعب هذا الغباء الاداري و لكنه من الواضح انه عرف معروف هناك فلم يعترض احد سواي ... اثرت الصمت لان كلام الفتيات مهما كُنَّ في تلك الاجواء ( الكل ملتحي يرتدون جلباب ابيض قصير و بنطلون ابيض تحته ) غير محبذ رغم انه لم يقل احد بشئ .... أدركت ان الكاتب اصر علي بقاء الطبيب "الملتحي"  رغم وجود الطبيبة النبطشية لان العرب لن يفضلوها لامضاء الاوراق ( او قد تكون مشاكسة قليلًا و هم لا يريدو مشاكل لا اعلم حقًا ما السبب )
الغالب علي سكان تلك المنطقة هو الطابع السلفي ( النقاب و اللحية للجميع ) بغض النظر عن التمسك بصحيح الدين و الاخلاق ام لا .

ما هو سبب الوفاة ( طبيعي ام غير طبيعي ) كاد الطبيب ان يشير لخانة غير طبيعي لولا انهم اصروا ان يكتب طبيعي ، قال الغير طبيعي هو الجنائي قالوا نعم ، قلت و هل الموت بحادث سيارة هو موت طبيعي ؟؟ قالوا نعم !! بلعت حنقي و سكت . كتب طبيعي . و كتب التشخيص ، نزيف في قاع الجمجمة ادي للوفاة . ثم استكملوا البيانات من شهادة ميلادها و قسيمة زواجها ... شعرت برجفة ... تجسدت حياتها أمامي في ثلاث ورقات ثم يطويها التراب الا عن قلوب محبيها !!!

امضيت بقية الطريق شاردة و هم يتكلمون حتي وصلنا للمحطة .

وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُم مِّنَ الطَّيِّبَاتِ وَفَضَّلْنَاهُمْ عَلَى كَثِيرٍ مِّمَّنْ خَلَقْنَا تَفْضِيلاً ( 70) الإسراء 

************************

************************

لماذا اكتب هذا الكلام ؟؟
ليس للكتابة سبب منطقي في حالتي ، فالجميع يعرف كم الفساد الموجود في البلد ... و لا ينتظروا ما اكتب كي يتم الكشف عنهم لان المحاولات اكثر عبثًا بحق ... لا يوجد اي معني في رايي أن نقبض علي شخص يسرق عدة جنيهات و هناك من ينهب البلد بشكل مستمر و دائم و " قانوني " !! و لست اكتب كي اضع حلولًا ، أي حل سيكون مجرد " طق حنك" لاننا بلا حيله 

في الواقع اظني لازلت اكتب لاني احب الكتابة ، لم افقد هوايتي القديمة في تتبع أحوال البشر و الكتابة عنهم ، لكل انسان مهما تكرر قصة مختلفة ، و في زمننا يكون الامر جد صادم من كم التناقضات المجتمعه ، كما اني اكتب لانه المنبر الوحيد المتبقي الذي اشعر فيه بحريتي الكاملة ! الكلمات تجعلني احلق بحق  برغم كل شئ بائس حولنا  ...