بعض يتحدث عن قضية التحرش و يفترض ان الحلول الجوانية ناجعة ... انا مع الحلول دي لما يكون عندنا مجتمع اخلاقي متربي عنده بقايا قيم ممكن يجدي معه الكلام دا , مجتمعنا مجتمع علماني بإمتياز حتي و ان كرهنا الكلمة , تدين الجامع و صيام رمضان شئ منفصل تماما عن كل انشطة حياته ... الاساليب الدينية و القيمية دي تنفع فعلا بس مع ناس اسوياء , لكن احنا للأسف الشديد في شبه دولة او دولة فاشلة و منهارة بمعني الكلمة في كل المجالات ( الا ما رحم ربي ) فهل الوازع الديني ممكن يؤثر في هؤلاء ؟؟؟
هل البعض متخيل ان اللي بيتحرش يبقي لتفرشغ شهوة قلة ذات اليد في الزواج مثلا ؟؟؟ معلش هو التحرش اصلا شئ عدل اوي ؟؟ ولا بيفرغ اي طاقة ؟؟؟ و بعدين فيه متحرشين اطفال او مراهقين لم يبلغوا بعد ... دول ايه بقي ؟؟و فيه متحرشين متزوجين بالفعل ... دول ايه بقي بردو ؟؟؟اللي وصل لمرحلة التحرش اساسا دا انا بعتبره اسقط حاجات كتيرة اوي من حساباته لحد ما وصل للمرحلة دي من الاخر فقد جزء كبير من انسانيته و ربنا مش في حساباته اساسا ... الوازع الديني هيردعه اصلا ؟؟؟ إن الله يزع بالسلطان ما لا يزع بالقرآن) أثر عن سيدنا عثمان بن عفان ، معناه يمنع بالسلطان باقتراف المحارم، أكثر ما يمنع بالقرآن؛ لأن بعض الناس ضعيف الإيمان لا تؤثر فيه زواجر القرآن، ونهي القرآن، بل يقدم على المحارم ولا يبالي، لكن متى علم أن هناك عقوبة من السلطان، ارتدع، خاف من العقوبة السلطانية، فالله يزع بالسلطان يعني عقوبات السلطان، يزع بها بعض المجرمين أكثر مما يزعهم بالقرآن لضعف إيمانهم، و اكيد اللي بيعمل الجرم دا معدوم الايمان من اساسه ....انا ضد التحرش بجميع اشكاله اللفظي و كل شئ و المسؤولية مشتركة - و علي الرجل اشد - مش هفصلها عن انه سياق ملوش اي مؤثرات لأ له و انا مش مع فكرة ان ست تلبس اللي هي عايزاه و هي عارفة اننا في مجتمع حيواني و مفيش فيه قوانين كمان ... لكن فعلا فيه حالات تحرش ضد المحجبات و اللي لابسيت حجاب كامل و صحيح فعلًا ... فمش كل التحرش ناتج عن اللبس كل واحد يعمل اللي عليه و ياخد بالاسباب ....
فكرة عدم تطبيق قوانين رادعة ضد التحرش من ضمن عدم احترام دولتنا للإنسان المصري اساسًا , لأن شرم و الغردقة اكيد معروف الاجانب بيلبسوا فيها ايه و مع ذلك مفيش العك اللي بيحصل دا لان الشرطة شايفة شغلها كويس علشان مواطنين الدول دي لهم حقوق انسانية مش للمصريين للأسف ...
هي منظومة مجتمعية كاملة لو اتعدلت هتتعدل فيها كل الجزئيات منظومن بتضم بهدلة الناس في اي اجراء حكومي , بهدلة الفقراء في الكشف في مستشفي حكومي لو عيي و ميعرفش هل بيتعالج صح ولا لأ و هل هيعرف يجيب الدواء ولا لأ , بهدلة الناس اللي بتسافر تشتغل برا في الخليج و استعبادهم بنظام الكفيل , بهدلة البنات هنا في التحرشات , بهدلة الشاب لما يجي يتقدم من اهل العروسة و التعامل مع علي انه زبون , بهدلة البنت لما حد يتقدم لها من اهل العريس و التعامل معها علي انها بضاعة , بهدلة اي عامل في القطاع الخاص ملوش تأمين لو مرض , بهدلة اي واحد عايز يركب مواصلات و معهوش عربية انه يوصل بآدمية , بهدلة اهالي شهداء ثورة يناير في صرف مستحاقتهم , بهدلة اي انسان ملوش اي سلطة اتظلم في ان حقة يرجعة بمنتهي الآدمية بدون ما يدفع او واسطة ...
لما المنظومة اللي احنا عايشين فيها دي , تتعدل و نتعامل بآدمية شوية مع بعض و النظم تتصلح و يكون فيه عقوبات رادعة و تتنفذ بالعدل , ممكن اقول ان التحرش هيقف و ينتهي ...
ليست هناك تعليقات:
إرسال تعليق