السبت، 10 أكتوبر 2015

4- الحقوق تنتزع F.B.

 كتير من البنات لا يملن للمواجهات في الخصومة و المشاكل و تقعد تفكرو تلف و تدور لحد ما توصل للهدف بتاعها بالتورية و بالتلميح و بشكل غير مباشر علشان خايفة ان اللي قدامها يزعل ( ده لو زاد بيبقي نفاق خلوا بالكم ) ، و جزء من تقديرهن لذاتهن لما بيشوفوا نظرة التقدير لهن في عيون الآخرين ... علشان تحس انها جميلة و الكل شايف الجمال ده . نظرة التقدير و رقة البنات عامل كبير في التعاملات .


علشان كده لو طلبت شئ و حست ان اللي حوليها مش راضيين عنه بتسحب الطلب ، علشان تنال الاستحسان بس هي بتبقي بتهري و تنكت في نفسها انها محسوش بيها ... هي بتبقي فاكرة انهم هيحسوا لكن اللي بيوصل لهم انها مش جد في طلبها ده .
مرة صديقة ليا كانت بدأت تتعرف على حد و كنا في عمل تطوعي و فيه زملاء ، و الكلام مع الزملاء في حدود لكنهم موجودين معانا ... المهم اخينا ده لما حكت له علي العمل ده قاللها متشتغليش تاني و هي قالت لي هتنسحب ، قلت لها انت مبتعمليش حاجة غلط و بعدين انت التزمتي معانا و عملنا حسابنا عليكي و فيه شغل كبير انت هتقومي بيه و مينفعش تنسحبي فجأة كده ، معلش اعتذري له ... و قد كان فعلا و اعتذرت له ، و كانت متوقعة انه هيتقمص و يقفش عليها ... قلت لها بعد كده ايه الاخبار ، قالت لي تصوري انه معملش حاجة خالص و الموضوع عدي عادي خالص ؟؟ قلت لها ازاي ؟؟ قالت لي انه قاللها انه لما قاللها كده ،كان بيشوف لو كانت بتعمل شئ غلط كانت هتسمع كلامه و تحس بالذنب ، لكن طالما هي محستش ان اللي بتعمله غلط فعلشان كده متراجعتش فخلاص هو مطمن عليها !!!
تخيلوا التفكير الحقيقي ازاي و احنا بنيجي علي نفسنا و فاكرين اننا بنكسب نقاط ؟؟ المهم بس الاسلوب اللي يتقال بيه و نبعد عن الانفعال ، الهدوء اهم شئ في التمسك في الحق لانه الانفعال بيعصب اللي قدامك و في نفس الوقت بيحسسه انك مش واثقة في نفسك و صاحبتي دي ماشاء الله عليها كانت بارده و ده اللي ساعدها 
هكذ بقي لو عايزة اي شئ في الحياة او فيه حاجة معينة مش مريحاكي لازم تتكلمي ، متتخيليش ان اللي قدامك بيقرأ الافكار و هيفهم انت عايزة ايه ... لازم يا بنت الحلال تبيني كده و توضحي بأكتر من اسلوب انك عايزة الشئ ده بشكل حقيقي مش مجرد لو قالوا لك لأ خلاص !!

ليست هناك تعليقات:

إرسال تعليق