7- هناك كرامة بين المحبين F.B.

فيه جملة مجحفة جدًا بتقال انه مفيش كرامة بين المحبين ، بالعكس ... فكرة انه ممكن يغلط فيكي ، يشتم ، او يعمل اي تصرفات فيها تقليل من شأنك زي انه مثلا يتريق على اهتماماتك ،شغلك ، اي شئ انت بتحبيه ، حتي لو رأي انت قلتيه و طلع غلط مهياش نهاية الدنيا يعني ان حد يقول شئ غلط ... كل ده بيقول انه انسان غير جدير بالثقة و الاحترام

مرة واحدة صاحبتي كانت من مجانين الكورة ، و في اول جلسة تعارف مع اللي المفروض عايز يتقدم لها كانا في كافيه و هي علي ترابيزة و اهلها علي ترابيزة ، كان فيه ماتش شغال فهي كانت بتابع الماتش لما هو يكون قايم ولا بيختار اكل ولا كده ( مش و هو بيتكلم ) بس هو معجبوش و في مرة تانية لما قال لاهلها انه موافق بس محتاج مرة تانية قالت له هتتكلم امتي قاللها معاد فلاني ، استنته و اتأخر ساعتين فبعتت لك علي الواتس اب انها مستنياه و لو فيه شئ حصل ياريت يقول لانها قلقت .... قاللها بتريقة اصلي قلت لو فيه ماتش ولا حاجة تتفرجي عليه !! لما اتصل طلعت فيه و قالت له انا مسمحش لحد انه يتريق علي اي شئ من اهتماماتي و ميمشيش معايا نظام تلقيح الكلام ده و لو عايز تتأخر تعتذر مش تلزقها فيا ... بصراحة علمته الادب ... و طبعا الخطوبة مكملتش علشان كانت فيه مشاكل كتيرة في شخصيته .

حتة انه يحترمها و يحترم اهتماماتها دي بتبقي ناتجة انه انسان مش مليان كلاكيع . فيه نوعية من الولاد متفهمش ليه بيحبوا يحسسوا الست انها اقل منهم ( و لو بالتهريج ، لاننا كمصريين بنقول الجد في صيغة تهريج علشان لو قفشت يبقي انت اللي مخك صغير و انا بهرج لكنه بيكون قاصدها فعلًا ) هل ده لانهم حاسين انهم قليلين و عايزين يثبتوا نفسهم علي حد ؟؟ الله أعلم ايه السبب ، الفكرة انه لو النوعية مش موقفتش عند حدها من الاول هيسوق فيها و مش هيحس انه بيعمل شئ غلط لانك متكلمتيش .

للاسف الامر ده مش بيقف عند الحد ده ، ليا صديقة حكت لي عن ان ابوها كان متفنن انه يهين والدتهم قدامهم ، هي كانت بتبقي مكسوفة ان الاب مش عامل لها احترام قدام الولاد ، و بقت تضحك علي تريقيتهم اللي بتقلل من شأنها رغم ان لها منصب كبير في الشغل ... المشكلة انه في العقل الباطن للاولاد بقوا بيستهيفوا الام دي من كتر تريقة الاب عليها و التقليل من شأنها ... لحد ما صاحبتي دي انتبهت للامر ده لما كبرت و اتجوزت و خلفت ... حست بألم امها ... و سألتها ، قالت لها يا بنتي ما انا مش عايزة أعمل مشاكل !!! للاسف اتعودنا نتهاون في حقوقنا و اسوأ حاجة انه لما بيحصل تهاون في الكرامة لما الواحد بيبقي عايز يصلح الغلط بيتقال له و رضيت من الاول له ؟؟ بس ده مش مبرر انك تستمر في قبول الإهانة ... وقف الإهانة في اي وقت و متتماداش فيها ...
و للاسف لو الزوج مش عامل كرامة او محترمها من الاول صعب اوي شئ زي ده يجي بعدين :((
و زمان في الامثلة الشعبية اتقال : اللي يقول لمراته يا هانم يستقبلوها على السلالم ، و اللي يقول لمراته يا عورة يلعبوا بيها الكورة .

خلوا بلكم من النقطة الحساسة و الحرجة دي و التركيز عليها مش نكد ابدًا .