( رأي شخصي عما اظنه اسلم )
فيه فروقات طفيفة بين الولاد و البنات ده معروف ، بس ده مش معناه انها بنفسها تمارس الامر ده و تدي له امتيازات هي مش واخداها !!! معني الاختلاف مش في الحقوق و لكن في طبيعة كل نوع ..
أهم الاشياء اللي اي واحدة و واحدة لازم يكونوا عاملينها قبل ما يدخلوا في علاقة قديمة انهم يكونوا " حرقوا " اثار اي علاقة مرت مش مجرد طوو الصفحة و خلاص علشان ميظلمش نفسه و يظلم اللي جاي ده و يفضل يدخل في مقارنات لا حد لها ... احنا ناس ناضجين و طبيعي نقابل ناس نعجب بيهم او يكون فيه خطوبات تتفك او حتي كتب كتاب سابق ... نادرًا ما حد بيكمل من اول علاقة ، غالبًا بيكون فيه تعلق و لو من بعيد حتي لو مكنش فيه مصارحة .
الفكرة انه لما واحد يجي يتقدم لك او يبتدي فيه إعجاب او استلطاف و بدأتوا في مرحلة المصارحة و الكلام الشخصي اللي خارج الكلام العام ، من اسوأ الاشياء اللي بتحصل انه يقعد يكلمك عن حد عرفه قبل كده او حد معجب أو أو أو his ex-s ... ده مش من الذكاء خالص و معناه انه لسة مستحوذ علي جزء من تفكيره و لم يتعافى تمامًا ... و الحقيقة انه مش مهمتك انك تشتغلي له طبيب نفساني .
القوامة ان الرجل يشيل مش الحبيبة تتحول لأم و تقعد تطبطب ... العقلانية في الاحايين دي مش كويسة خالص بالعكس ، هو بيبقي واصله انها مجرد female friend او اخت ... يرتاح معاها في الحديث و يفضفض ، تتحمل و تطبطب و هياخد منها الحنية الانثوية بتاعة الأخت ... بس مفيش اي مسؤولية عليه انه يخلي باله علي مشاعرها لا تضايق ولا حاجة . هي بتفتكر انه لما تسمع منه النقطة دي بالذات انها بتعلي عنده كحبيبة و ممكن تبقي الخطوة القادمة انه يتقدم لها ... متعرفش انها من حيث لا تحتسب هي بتتحول لأخت مش لحبيبة .
الحبيبة لازم يبقي مش شايف غيرها ، هي اللي مستحوذه علي مشاعره ، و حتي لو هو بيتعافي يبقي لازم لازم لازم يخلي باله ميتكلمش عن حد غيرها في حضورها بشكل اعجاب ذكر لانثي مش اعجاب عابر عادي ( بلاش غباء يعني لانه مش كل الاعجابات بتتحط في الخانة دي فيه اعجاب بالمنتج مش بالشخصية اللي قدمت المنتج مش ده موضوعنا ) لو قعد يتكلم عن السابقة و عملت معاه ايه ، يبقي هو لسة بيفكر فيها
عكس الحب مش الكره ... الكره هو اهتمام بس بشكل سلبي ... عكس الحب هو اللا مبالاه ، كأنه لم يكن من اساسه ... علشان كده خلي بالك اوي من النقطة دي علشان بنات كتيرة بترجع تعيط و هي اللي فهمت غلط من الاول و اتعاملت مع الرجل علي انه بدماغ انثوية !
ليست هناك تعليقات:
إرسال تعليق