السبت، 24 أكتوبر 2015

10- العدل و الفضل F.B.

مفهومان مهمان غالبًا ما يحدث الخلط بينهما في العلاقات الإختيارية ( الصداقة و الزواج ) و هذا الخلط يؤدي لكثير من المشاكل فيما بعد .

و حتى لا يكون الكلام مجرد اسقاط علي التجارب الفاشلة أو انها تكون بالبلدي "علمت علينا " ولان نغمه مفي ش صاحب يتصاحب دي نغمة المراهقين في العلاقات و ليس الناضجين ... و بتيجي من الفشل في إدراك المفهومين دول في العلاقات ، العدل و الفضل .
العدل : هو حقي و حقك و نحط النقط علي الحروف من البداية ولا أتطوع في تقديم اي شئ ولا اطالب بأكثر من حقي .

الفضل: مرحلة اكثر عمقًا في العلاقة يتغاطي المرء عن بعض حققه و قد يعطي بأزيد مما هو واجب عليه .

قد يبدأ المرء بالفضل البسيط ( حتي نذيب الثلج الاول و نفتح كلام ) لكن لو لم يقابل الفضل الاول بفضل او حتي عدل فلابد من الإنسحاب ... يمكن ان يتغاضى المرء مرة و اثنين ، و لكن مش اكتر من كده و الا غالبًا بيبقي طبع أو الطرف الاخر ببساطة مش عايزك ... بس الانسان عامة مبيقدرش يرفض شئ جميل جايله بس لو لم يبذل مجهود للحفاظ علي هذه المشاعر القادمة له بدون جهد فهو لا يستحقها في الحقيقة . ( و في الامثلة الشعبية بيقال التالتة تابتة و حتي الطلاق مرتين و التالتة بائنة ، صبر الخضر علي سيدنا موسي مرتين و الثالثة كان الفراق )
يفضل ان العلاقات تبدأ بالعدل ، و لو لاقيتي انه الطرف الاخر واخد باله و بيؤدي اللي عليه ممكن تزودي و تدخلي في حتة فضل شوية ... لو قابل الفضل بالفضل هيبقي شئ جميل ... لو لم يكن يستحسن ان الواحد يعرف يرجع لمرحلة العدل تاني و يفرمل نفسه في العطاء او يخليه مقنن و بذكاء .
نقطة اخري ، قد يبدأ المرء في علاقة معينة ، و يدخل بقلب جامد علشان لاقي صفات معينة في الشخص اللي قدامه عجبته ... لكن اللي قدامه ده بيديه و بيتعامل معاه بالعدل و بالقطارة ... و الاول مش مكفيه ... قدامه عدة طرق في التعامل ، الاولي انه يسلم ان هو ده شكل العلاقة و التاني مش عايزه اوي زي ما انا عايزه و خلاص بس يبقي فاهم ده من البداية علشان ميعيش في الوهم و يتصدم بعدين ... يا اما يقولله لانه ممكن فعلا ميكونش عارف او فاهم اللي قدامه كويس ، التفكير البناتي الاصيل بيقول انه لو هو معرفش من نفسه يبقي ملوش لزمة اطلب المشاعر ، بس في الحقيقة انه لأ .. ده مش تفكير سليم في كل الاحوال ، ساعات الطلب او التوجيه بيبقي الاخر ( خاصة لو رجل) محتاجه ... لان فعلا الرجالة كائنات بسيطة مش مركبة زيننا . الطلب مع حد كويس بيمشي الحال و مع الوقت و الصبر بيعمل اللي انت عايزاه ... لكن لو الطلب مجابش نتيجة يبقي خلاص . نرجع لخانة العدل و حقي و حقك و متتطوعيش في تقديم اي شئ لانه مش هيقدر التقديم ده . ( ده بردو بينطبق بس بقدر اقل مع الصداقة )
فيه شكل علاقات بيبقي مريض ، و هو انه حد بيتعامل دائمًا بالفضل و يدي يدي يدي ، و حد بيتعامل بالعدل و مبيديش الا اللي المفروض يديه ( و ساعات كمان بيخنصر ) لكنه بيتمتع بالاخذ المفتوح . دي علاقة عرجاء ... اي علاقة بين طرفين لازم تكون متوازنة ، قدميها او جناحيها متوازنين و الا هيبقي اعرج و عمرها ما هتمشي بسلام . لازم العرج ده يتم تداركة ... و حتي لو كنتي متعودة علي العطاء و سعادتك فيه ، نفسك ليها عليكي حق انك تقدريها ، و لو مقدرتيش نفسك محدش هيقدرك . و ده عامة محتاج حرفنه و ذكاء في التعامل ... اللي عايز يبني علاقات بجد لازم يكون نفسه طويل و مش صدامي لكن تدافعي .

ليست هناك تعليقات:

إرسال تعليق