النوعية دي من الشباب موجودة بس مش اغلبية ، و للاسف الإعلام هو اللي غرس انه " كل" الرجالة كده رغم ان القلة منهم هي اللي كده ... بس علشان الانصاف .
النوعية دي بتبقي بتحب بالفطرة كده تبقي قريبة من البنات ، الامر مش كله بشكل جنسي علي فكرة ، فيه بيبقي القرب طابعه اجتماعي في المقام الاول ...
فيه نوع من الشباب بيجيد التعامل مع الفتاة عن جدارة ، بيعرف بيكون جنتل بجد ، و بيعرف يبص بحياء و تقدير - مش بصات حيوانية زي ما البعض بيعمل و مش بصات بإستهانة بردو زي ما الغالبية بتعمل و مش بصات : اعوذ بالله من الشيطان الرجيم و ان المرأة هي الشيطان زي ما البعض بيعمل - و مش بصات متكلفة تبين لك انه مراهق و عايز يتلزق و يبدأ يتعرف او يتكلم زي ما حديثي السن او اللي خرجوا من تكوينات مغلقة بيعملوا و تحس انهم كانوا في جره و طلعوا لبرا ... لأ ده بقي نوع برنس .. بيعرف ازاي يتعامل و ازاي يتصرف و امتي يتكلم و امتي يسكت . النوع ده غالبًا بيبقي محاط بشلة كبيرة من البنات و البنات بتحب تقف معاه ... ( كان لينا واحد زميلنا في المدرسة في اعدادي و ثانوي من النوعية دي ، اخويا و واصحابه كانوا بيتريقوا عليه انه ملوش في اهتمامات الرجالة لكنه منسون وواد طري كده... و طبعا النوعية دي كانت بتكتسح الانتخابات بتاعة المكتب التنفيذي لو حد فاكر يعني بأصوات البنات السذج :D
الامر ممكن يقف لحد العلاقات في الشغل او الجامعة و خلاص ، و ممكن للاسف يطور لأشياء تانية لو الوازع الاخلاقي مش قوي ... البنت لو حبت شخصية زي دي و هو بادلها الحب بتبقي طايرة بمعني الكلمة ، لانه أساسا فاهم هي عايزة ايه و الإشكاليات التقليدية بين البنات و الشباب مش موجودة بينهم لانه موهوب و فاهم نفسيات البنات ... و عارف من اين تؤكل الكتف ! و من هنا تيجي الخطورة و الميزة تتحول لعيب قاتل ، مش بقول ان كلهم كده ، بس فيه فئة مش قليلة كده ... خاصة لو الأخلاق مش قوية و هوائي و اهم شئ رغباته مش احساسه بالواجب و المسؤولية .
النوعية دي بتبقي نوعية مبتلاه فعلا و اللي تقع في ايديهم ( اقصد اللي فاهم البنات و في نفس الوقت معندوش اخلاق ولا التزام مش الكل علشان انا بكره التعميم ) يبقي ربنا معاها بجد ... بتيجي غلطة المجتمع المتخلف انه لو واحدة جوزها اتجوز عليها يبقي العيب فيها !!! دي فكرة اكثر من ساذجة لانه مفيش ست مهما كانت مهما كانت لو جيبتو اجمل واحدة في الكون فيه اللي اجمل منها و كل واحدة اساسا و لها حلاوتها الخاصة و روحها ، بس فيه ناس مش بتكتفي بحلاوة واحدة بس ... طبعها كده :/
فطبعا المجتمع الغبي يحمل الست نتيجة شئ هي مش مسؤولة عنه ... و طبعا ناهيك عن الكلام المفرط في الذكورية اللي بيقول ان اصل الرجالة هو التعدد ... التعدد معمول علشان النزعة دي يكون لها متنفس سوي عند الرجالة المبتلين بالامر ده . و ياريت اساسا اللي بيعدد بيراعي الله في الست اللي معاه . التعدد مش هو الاصل و لو كان الاصل كان ربنا خلق لسيدنا ادم عدة حوائات و ليست واحدة لإعمار الارض لكن هذا لم يحدث .
غالبًا بيكون مصاحب للصفة دي الهوائية الشديدة و التردد ، و انت هتلاحظي ده فيه و انه بيقارن بيكي او بيتكلم عن بنات كتير غيرك ( ي ما قلنا قبل كده في حكاية اخت و صديق مؤنث) ... الافتراق عن واحد فاهم البنات اوي كده مش بيكون سهل ابدًا ، بس اللي بيكملوا مع النوعية دي بيعيشوا في جحيم ، لانهم بيكونوا اتحبسوا في العلاقة ، بيعانوا لكن بيقارنوا هل هيلاقوا اللي يفهمهم اوي كده زيه ولا لأ ؟؟
عزيزتي ، انفدي بجلدك و وجع ساعة ولا كل ساعة ... احنا مش بنعيش الا مرة واحدة و ارمي تكالك علي الله انه يرزقك بحد احسن .
يبقي اني اقول انه النوعية دي موجودة في البنات بس بدرجة اقل جدًا ، بتتسمي السيدة المزواجة ، الحالة دي مشوفتهاش الا مرة و سمعت عنها مرة واحدة بس و شوفت نموج متمثل لها في فيلم كشخصية جانبية مرة احدة بس ( 3 نماذج ) ... و دي بتبقي بتتجوز و بتتطلق كتير و بتعرف في المقابل ازاي تغوي الرجل العادي مش الفاهم و توقعه و طبعا بتبقي جذابة لنوعية معينة من الرجال ... و حتي لو خلفت بتسيب الولاد لأزواجها و تنطلق نحو رغباتها . بس طبعا النموذج الرجالي للنوع ده من البشر اكتر بكتير
ليست هناك تعليقات:
إرسال تعليق